Poslovne vesti - Makedonija

Во РЕК Битола се инвестираат 100 милиони евра

Започна модернизацијата на РЕК Битола која ќе се реализира со 100 милиони евра. Од Електрани на Македонија (ЕЛЕМ) соопштуваат дека во РЕК Битола започнуваат со реализација на модернизацијата и автоматизацијата на турбоагрегатите, што би претставувало најголема инвестиција од завршувањето на изградбата на комбинатот во 1988 година.

-Според договорот, руската компанија "Силовие машини", која е избрана како најповолен понудувач, по принципот "клуч на рака", почнувајќи од годинава па заклучно со 2012 година, ќе ја реализира оваа инвестиција вредна 55,9 милиони евра, од кои 30 милиони евра се кредитно задолжување од Стопанска банка, додека останатите 25,9 милиони евра се сопствени средства на ЕЛЕМ - информираат од енергетската компанија.

Со модернизацијата на турбоагрегатите на ТЕ "Битола" ќе се продолжи експлоатациониот век на енергетските блокови за најмалку уште 120.000 работни часови.

-Инвестицијата ќе ја зголеми инсталираната моќност на секој од трите агрегати во ТЕ "Битола" за дополнителни 8,32 мегавати по блок, односно вкупно 25 мегавати инсталирана моќност за трите блока. Тоа ќе значи и зголемување на производството на електрична енергија од 160 до 200 гигават-часови на годишно ниво, без зголемување на специфичната потрошувачка на јаглен - објаснуваат од ЕЛЕМ и додаваат дека со модернизацијата на енергетските блокови ќе ги редуцира динамиката и оперативните трошоци за ремонти и тековно одржување на термоелектраната во наредниот период.

Од ЕЛЕМ најавуваат и отворање на подинската јагленова серија на рудникот "Суводол".
-Потпишан е и договорот со германската компанија "Тисен Крупп" за набавка и монтажа на главниот транспортен систем за јаглен од површинскиот коп Брод - Гнеотино до рудникот "Суводол" што претставува инвестиција вредна 17,3 милиони евра, која ќе се реализира во наредните 12 месеци - потсетуваат од ЕЛЕМ и нагласуваат дека последните инвестиции ќе придонесат за продолжување на векот на експлоатација на РЕК "Битола" и за стабилно производство на електрична енергија во наредните 20 до 25 години.